Braziliyanın Rio-de-Janeyro şəhərində keçirilən Yay Olimpiya Oyunlarında kişilər arasnıda boks turnirində 56 kq çəki dərəcəsində qarşılaşma qalmaqalla başa çatıb.
“Riocentro” arenasında irlandiyalı Maykl Konlanla rusiyalı Vladimir Nikitin qarşılaşmışdılar. Hakimlərin yekdil rəyi ilə qələbə Rusiya təmsilçisinə verilib.
24 yaşlı dünya çempionu, belfastlı Maykl Konlan qərarla razılaşmayıb.
O, “Twitter”dəki profilində Rusiya prezidenti Vladimir Putinə xitabən yazıb: “Hakimlər məni qızıl medaldan məhrum etdilər. Vlad, AİBA Nikitinin qələbəsi üçün səndən nə qədər pul istəmişdi?”
1/4 final mərhələsində döyüşü uduzan Maykl Konlan rinqdə rəqibinə və hakimlərə əli ilə biədəb jest göstərib.
Jurnalistlərə açıqlamasında isə o, Beynəlxalq Həvəskar Boks Assosiasiyasından (AİBA) danışıb: “AİBA fırıldaqçılardır. Lənətə gəlmiş saxtakarlar! Bundan sonra heç vaxt bu əclafların keçirdikdəri yarışlara qatılmayacağam. Bilirsiniz nə var?! Qarşıda peşəkar rinqdə əla karyeram var. Həvəskar boksdan isə artıq iyrənirəm! Əclaflar, saxtakarlar, murdarlar!” (milli.az)
