Dərman vasitələrinin qanunsuz dövriyyəsi və qaçaqmalçılıqda təqsirləndirilən şəxslər növbəti dəfə hakim önünə çıxarılıb.
Musavat.com xəbər verir ki, onlar xarici ölkə vətəndaşları Ateş Atanur, Dövlət Gömrük Komitəsinin Tibbi Xidmət İdarəsinin rəisi Fikrət Qədiməliyev (barəsində polis nəzarətinə verilmə qətimkan tədbiri seçilib), Cəmil Mehtiyev, Əlamət Quliyev, “Zeytun” apteklərindən birinin sahibi Anar Məmmədov, Vasif Xıdırov, Elnur Məmmədov (barəsində polis nəzarətinə verilmə qətimkan tədbiri seçilib) və Fərman Məmmədlidir.
Bu gün Bakı Ağır Cinayətlər Məhkəməsində hakim Zeynal Ağayevin sədrliyi ilə keçirilən məhkəmə iclasında şahidlər ifadə verib.
İlk şahid Gömrük hospitalının mühasibi Elnurə Novruzlu olub.
Şahid bildirib ki, gün ərzində kassaya yığılan pulu Fərman Məmmədliyə təqdim edib. Onun sözlərinə görə, gündəlik gəlir heç vaxt tam olaraq rəsmiləşdirilməyib:
“Mən pulu günün sonunda alırdım. Fərman müəllimə təqdim edirdim. Xəstələrin siyahısını da verirdim. Şəhər işdə Fərman müəllim mənə həmin siyahını verirdi. Siyahıda rəsmiləşdiriləcək adların qarşısına işarə qoyulurdu. Mən də həmin siyahını rəsmiləşdirirdim”.
Elnurə Novruzlu qeyd edib ki, gündəlik gəlirin ən çox 30 faizi rəsmiləşdirilib: “Bəzən 30, bəzən də 1000 manat rəsmiləşdirilirdi. Amma ən çox məbləğin 30 faizini rəsmiləşdirirdik. Bunu da idarə rəsinin göstərişi ilə edirdik”.
Təqsirləndirilən Fərman Məmmədlinin vəkili Gülşən Süleymanova şahidə sual verib. Vəkil soruşub ki, idarə rəisi Fikrət Qədiməliyevdən xəbərsiz hər hansı bir iş görmək olardımı?
Elnurə Novruzlu deyib ki, hospitalda bütün işlər idarə rəsinin nəzarəti ilə həyata keçirilib.
Gülşən Süleymanovanın hospitalın aptek və yeməkxanasından gələn gəlirlə bağlı sualına isə şahid belə cavab verib: “Həmin gəlir də Fərman Məmmədliyə təqdim edilirdi. Yeməkxanadan 300-400 manat gəlir gəlirdi. Amma aptekin gəlirindən xəbərim yoxdur”.
Suallardan aydın olub ki, hospitalda bağlı olan qadın sağlamlıq mərkəzi də fəaliyyət göstərib. Elnurə Novruzlu həmin mərkəzə də Fərman Məmmədlinin nəzarət etdiyini deyib.
Elnurə Novruzlu hospitalda “Silinmə Komissiyası” olduğunu da deyib: “Mən niyə həmin komissiyanın üzvü olduğumu bilmirəm. Amma sənəd gələndə imza çəkirdik. Həmin siyahıda xəstələrə verilən dərmanlar var idi”.
Təqsirləndirilən Fərman Məmmədli də şahidə sual verib: “Hospitalda bütün işlər kimin nəzarəti ilə həyata keçirilirdi?
Şahid Elnurə Novruzlu bütün işlərə idarə rəisi Fikrət Qədiməliyevin nəzarət etdiyini deyib.
Vəkil Gülşən Süleymanova ev dustaqlığında olan general Fikrət Qədiməliyevə sual verib: “Şahid dedi ki, hər işə siz nəzarət edibsiniz. Amma siz ötən prosesdə bu işlərdən xəbərsiz olduğunuzu deyirdiniz. Bu haqda nə deyə bilərsiniz?”.
General bu suala cavab vermək istəmədiyini deyib, bildirib ki, istintaqda ifadə verib.
Məhkəmənin davamında şahid İltizam Hüseynəliyev də ifadə verib.
O deyib ki, Gömrük hospitalında xəzinədar vəzifəsində işləyib. Hüseynəliyev deyib ki, xəstələrdən aldığı pulun qarşılığında onlara qəbz verib. Gün sonunda isə pulları mühasib Elnurə Novruzluya təqdim edib.
Şahid Hüseynəliyevə sual verilib və Fikrət Qədiməliyevin işlərə necə nəzarət etdiyi soruşulub.
“Necə oturmağımıza belə Fikrət müəllim nəzarət edirdi. Elə vaxt olurdu ki, kameradan baxıb, gecə saat 4-də zəng edirdi ki, o necə oturmaqdır?”- deyə şahid suala cavabında deyib.
Prosesdə hospitalda xəzinədar vəzifəsində işləmiş Rəna Məmmədova, Rəna Hacıyeva, Aynurə Şirinova da ifadə veriblər. Onlar eyni məzmunlu ifadə verərək xəstələrə ödəniş qarşılığında qəbz verdiklərini deyiblər. Bildiriblər ki, sığortası olan xəstələr qəbz tələb edəndə onlara qəbz verilib. Müştəri istəmədiyi halda ona qəbz təqdim edilməyib.
Xatırladaq ki, Baş Prokurorluğu, Dövlət Təhlükəsizliyi Xidməti və Dövlət Gömrük Komitəsinin mətbuat xidmətlərinin birgə yaydığı məlumata əsasən, 30 aprel 2018-ci il tarixdə keçirilmiş birgə tədbirlər zamanı belə qanunsuz fəaliyyətlə məşğul olan mütəşəkkil dəstə müəyyən edilərək ifşa olunub.
Belə ki, görülmüş tədbirlər nəticəsində Bakı Beynəlxalq Hava Limanındakı Bakı Karqo Terminalından gömrük nəzarətindən yük maşınında çıxarılaraq dərman vasitələrinin qanunsuz dövriyyəsi ilə məşğul olan Məmmədov Anar Kamran oğluna məxsus yaşayış sahəsinə daşınan dövlət qeydiyyatından keçməmiş, ölkəyə buraxılması qanunsuz olan 53 adda ümumi dəyəri 108.819 Azn təşkil edən müxtəlif dərman vasitələri aşkar edilərək saxlanılıb. Səhiyyə Nazirliyinin əməkdaşlarının iştirakı ilə A.Məmmədova məxsus Yasamal rayonunda yerləşən “Zeytun” aptekinə baxış zamanı dövlət qeydiyyatından keçməmiş, mənşəyi məlum olmayan 75 adda müxtəlif dərman vasitələri aşkar edilərək götürülüb. Davam edən araşdırmalarla Yasamal rayonu ərazisindəki “İrem”, “Qlükoza”, “Avas”, “Fatimə”, Nəsimi rayonu ərazisindəki “Zeytun”, “Medical City”, “Elit”, “Vahid”, “Dokta Elite”, Nərimanov rayonu ərazisindəki “Şəfa”, “Şəfa Zeytun 426”, “Təbib” apteklərinə satılmış müxtəlif sayda dövlət qeydiyyatından keçməmiş dərman vasitələri aşkar edilərək dövriyyədən çıxarılıb.
İlkin istintaqla müəyyən edilib ki, xarici ölkə vətəndaşı Ateş Atanur, Azərbaycan Respublikasının vətəndaşı Anar Məmmədov 2016-cı ildən hazıradək satış məqsədi ilə dərman vasitələrinin ölkəyə qanunsuz yollarla gətirilməsini müntəzəm təşkil ediblər. Dövlət Gömrük Komitəsinin Tibbi Xidmət İdarəsinin vəzifəli şəxsləri bu dərmanların yük müşayiət sənədlərini dəyişdirərək Hava Nəqliyyatında Baş Gömrük İdarəsində Mərkəzi Gömrük Hospitalına çatması nəzərdə tutulan başqa məhsullar adı altında bəyan edilməsini, bu yolla qeyd olunan dərmanların ölkəyə qeydiyyatsız keçirilməsini təşkil etməyə görə əvvəlcədən hər yükün ümumi dəyərinin 25 %-i dəyərində haqq alıb, dərmanların ölkəyə qeydiyyatsız idxalını, gömrük nəzarətindən çıxarılaraq birbaşa dərman satışı ilə məşğul olan şəxslərə çatdırılmasını təmin ediblər.
Dövlət Təhlükəsizlik Xidmətində davam edən cinayət işi üzrə toplanmış ilkin sübutlar əsasında gömrük orqanlarında vəzifə səlahiyyətlərindən sui-istifadə etməklə qaçaqmalçılıq və külli miqdarda dərman vasitələrinin qanunsuz dövriyyəsi ilə bağlı cinayət əməllərinə görə Məmmədli Fərman Həmzə oğlu, Xıdırov Vasif Teymur oğlu, Mehtiyev Cəmil Səlim oğlu, Atanur Ateş Adem oğlu, Məmmədov Anar Kamran oğlu, həmçinin Quliyev Əlamət Nazim oğluna müvafiq olaraq Cinayət Məcəlləsinin 200-1.2.2, 200-1.2.3 (dərman vasitələrinin qanunsuz dövriyyəsi), 206.3.2, 206.3.3 (qaçaqmalçılıq) və 314.2 (səhlənkarlıq) maddələri ilə ittiham elan olunmaqla barələrində məhkəmənin qərarları ilə həbs qətimkan tədbiri seçilib.
Dövlət Gömrük Komitəsinin rəhbərliyi tərəfindən Hava Nəqliyyatında Baş Gömrük İdarəsinin rəisi Sadiq Abduyev, Tibbi Xidmət İdarəsinin rəisi Fikrət Qədiməliyev, Hava Nəqliyyatında Baş Gömrük İdarəsinin Birinci yük şöbəsinin rəisi Araz Məmmədov və digərləri tutduqları vəzifələrdən azad edilməklə sərəncama götürülüblər.
İlkin Muradov
Musavat.com
