Fransada Azərbaycanın güləş üzrə gənclərdən ibarət yığma komandasının qaldığı otelə polis basqını olub.
Publika.az 30 polis Replonj rayonunda yerləşən “Bresson” otelinə basqın edərək komanda üzvlərini dopinqə görə yoxlayıb. Bildirilir ki, polisləri otelin əməkdaşları çağırıblar. Onlar azərbaycanlı idmançıların oteldə dopinqdən istifadə etdiklərindən şübhələndiklərini deyiblər.
Şübhələrə əsas kimi istifadə olunmuş şprislər, infuzion kisələr, tibbi tullantılar və tibbi ləvazimatlarla dolu çemodan hesab edilib. Bütün bunlar idmançıların qaldıqları otaqlarda olub, onlar otel əməkdaşlarının gəlişindən “məmnun görünməyiblər”.
Xəbərə görə, səhərə yaxın 30 polis axtarış aparmaq üçün otelə basqın edib. Onları Fransanın anti-dopinq əməkdaşları müşayiət edib.
Prokuror Kristof Rode məsələylə bağlı açıqlama verib:
“Axtarışlar nəticə verməyib və cinayət işi qaldırılmayıb. Qadağan olunmuş preparatlar tapılmayıb. Lakin bəzi preparatlar leqal olsa da, dopinqdən istifadəni pərdələyə bilərdi”.
Fransanın antidopinq agentliyinin iki əməkdaşı azərbaycanlı idmançılardan sidik nümunələri götürüb və analizlərin nəticəsi bir neçə gündən sonra məlum olacaq.
Fransanın güləş federasiyasının prezidenti Alen Bertolom deyib ki, belə hadisə ölkədə ilk dəfə baş verir:
“Gənc güləşçilər dopinqdən istifadə edibsə, bu, çox narahatedicidir. Ola bilsin, bu preparatlar idmançılara ona görə lazım olub ki, çəkini nəzarətdə saxlasınlar və öz çəki dərəcələrində qalsınlar”.
Polis basqınına baxmayaraq, azərbaycanlı idmançılar Fransada keçirilən dünya çempionatında iki qızıl, bir gümüş və beş bürünc medal qazanıblar.
