Avropa Şurasının Parlament Assambleyası (AŞPA) Azərbaycan müxalifətinin liderlərindən biri, Milli Şuranın fəalı və Azərbaycan parlamentinin sabiq deputatı Gültəkin Hacıbəyliyə qurumun binalarına və tədbirlərinə ömürlük giriş qadağası qoyub.
Bu barədə AŞPA-nın Prosedur Qaydaları, İmmunitetlər və İnstitusional Əlaqələr Komitəsi qərar qəbul edib.
AŞPA üzvlərinin Korrupsiya İttihamları üzrə Müstəqil İstintaq Orqanının dərc olunan məruzəsinə əsasən, G.Hacıbəyli etik kodeksi pozduğuna görə ona sanksiya tətbiq olunub.
Məruzədə qeyd olunub ki, ittihamlarla bağlı mövqeyini bildirməsi üçün G.Hacıbəyliyə müraciət olunsa da, o, bundan yayınıb. Nəticədə onun assambleyanın binalarına, tədbirlərinə girişi qadağa edilib.
Xatırladaq ki, bu sessiyada Azərbaycandan olan üç nəfərin – Müslüm Məmmədov, Elxan Süleymanov və Gültəkin Hacıbəylinin ömürlük AŞ və AŞPA-ya girişi qadağan edilib. Digər bir neçə keçmiş xarici ölkə deputatlarına qarşı da oxşar sanksiya tətbiq olunub. (azvision.az)
