“Aprel döyüşləri zamanı biz sadəcə olaraq imkanlarımızın cüzi bir faizini nümayiş etdirdik. Bu, bir daha onu göstərir ki, aprel döyüşləri Ermənistanın təxribatı idi»
Bunu prezident İlham Əliyev aprel döyüşlərinin ildönümü ilə bağlı bir qrup hərbçi ilə görüşündə deyib. AzərTAC-ın məlumatına görə prezident çıxışında bildirib: “İndi bəziləri müxtəlif versiyalar, fərziyyələr irəli sürürlər ki, Azərbaycan əməliyyat keçirməyi planlaşdırırdı, o da sonra dayandırıldı və sair. Birincisi, biz nəyi etmək istəmişiksə, onu da etmişik. Əks-hücum əməliyyatında qarşımızda hansı hədəflər durmuşdusa, biz o hədəflərə də çatdıq. Bu gün hərbçilər və beynəlxalq mütəxəssislər bilirlər ki, əldə etdiyimiz strateji mövqelər tamamilə vəziyyəti dəyişdirib. Əgər aprel döyüşləri zamanı genişmiqyaslı əməliyyat keçirmək fikrində idiksə, biz öz hərbi potensialımızdan istifadə edərdik. Bunlar sirr deyil. Burada hər şey beynəlxalq monitorinq altındadır. Bilirlər ki, bizim uzaqmənzilli raketlərimizin, pilotsuz döyüş aparatlarımızın gücü nədən ibarətdir. Biz onlardan demək olar ki, istifadə etmədik. Amma əgər istifadə etsək, işğal olunmuş torpaqlarda düşmənin daşı-daş üstdə qalmayacaq. Bunu onlar bilsinlər və özünü növbəti dəfə biabır edən Ermənistanın siyasi rəhbərliyi danışığına fikir versin və bizim səbrimizlə oynamasın”.
Xatırladaq ki, bu günlərdə Ermənistan prezidenti Serj Sərkisyan Azərbaycanın işğal altındakı ərazilərində olarkən “gözünü də qırpmadan “İsgəndər” raketlərinin tətbiqi barədə əmr verəcəyini” deyib. Son vaxtlar Ermənistanda aprelin 2-nə təyin olunmuş parlament seçkiləri ərəfəsində Ermənistan siyasi rəhbərliyi görünməmiş hərbi ritorika nümayiş etdirir və gah işğal altındakı ərazilərdə təlimlər keçirməklə, gah “İsgəndər” raketləri ilə hədələməklə ötən ilki hərbi məğlubiyyətin bu seçkilərin nəticələrinə təsirini azaltmağa çalışır.
